Slik blir innsatsen til multilaterale organisasjonar vurdert
Nettverket består av 19 gjevarland, mellom dei Noreg. Utanriksdepartementet sit i styringskomiteen for nettverket, og Norad representerer Noreg i den tekniske arbeidsgruppa (Technical Working Group). Arbeidsgruppa jobbar mellom anna med metoden nettverket bruker i vurderingane sine.
Felles vurderingar
I perioden 2015–2019 gjennomførte MOPAN vurderingar av 31 multilaterale organisasjonar av ulike typar. Dette inkluderte internasjonale finansieringsinstitusjonar som Verdsbanken og den afrikanske utviklingsbanken, FN-organisasjonar som UN Women, UNFPA, og WHO, og andre typar institusjonar som det globale partnarskapet for utdanning (GPE).
I 2020 blir FN-organisasjonane UNDP, UNICEF, UNEP, UNOPS, ILO, OCHA, og det grøne klimafondet (GCF) gåtte gjennom. Kvar organisasjon blir gjennomgått kvart fjerde eller femte år.
Gjennomgangane vurderer organisatorisk og operasjonell effektivitet, inkludert ei vurdering av dokumentasjonen til organisasjonane av resultatoppnåing. Alle vurderingar – og svaret frå organisasjonane på desse – er tilgjengelege på MOPAN si nettside.
Bilaterale vurderingar
Utover desse felles vurderingane gjennomfører nokre av medlemslanda i nettverket eigne vurderingar av dei multilaterale organisasjonane. Desse inkluderer mellom anna Storbritannias Multilateral Aid Review (MAR) og Australias Multilateral Assessment. Ambisjonen for MOPAN er å minske behovet for slike bilaterale vurderingar.
MOPAN følgjer med på denne utviklinga og finn at vurderingane gjennomførte av MOPAN, blir brukte i stadig større grad av medlemslanda i nettverket, både som grunnlag for bilaterale vurderingar og i enkelte land si oppfølging av organisasjonane.
Norske vurderingar
I 2011 og 2013 utarbeidde Utanriksdepartementet vurderingar av organisasjonar som Noreg gjev støtte til. I seinare tid har ein valt å ikkje gjennomføre eigne vurderingar i tråd med føremålet i nettverket, men heller å bruke MOPAN-vurderingane som ei viktig informasjonskjelde om styrkar og veikskapar ved dei multilaterale organisasjonane.
Saman med annan informasjon og innsikt som kjem gjennom arbeidet med ulike norskstøtta program, og aktivt styrearbeid, dannar MOPAN-vurderingane eit godt grunnlag for konstruktivt samarbeid.
- Dette er vurderingane av 29 multilaterale organisasjonar frå 2013
- Dette er vurderingane frå 2011