Noreg og Verdsbanken gir felles støtte til nasjonalpark i Zambia
Infrastruktur viktig innsatsområde
Den norske ambassaden i Zambia og Verdsbanken lova å støtte Kafue nasjonalpark med 6,3 millionar dollar under lanseringa av Kafue nasjonalpark investerings- og promoteringsprogram i slutten av februar.
3 millionar skal brukast til å betre infrastrukturen i området, slik at ein kan skape den beste turistfasiliteten i området. I tillegg skal dei to organisasjonane støtte Zambia Wildlife Authority (Zawa) for å hjelpe styret av parken, skriv den zambiske avisa The Times of Zambia.
Erfaring på området
Norad har sidan 1980-talet støtta viltforvaltninga i Zambia. Hovudinnsatsen har vore retta inn mot å redde dyrebestandane og byggje opp gode forvaltningsrutinar i nasjonalparken South Luangwa.
Den norske støtta til viltforvaltning i Zambia var på om lag 17 millionar kroner i 2003, og er no under opptrapping etter å ha vore på eit lågare nivå i nokre år. Tanken er at viktige element frå modellen frå South Luangwa skal vidareførast i nasjonalparken Kafue, i samfinansiering med Verdsbanken. Dette skriv siste utgåve av fagbladet Bistandsaktuelt.